FARAZ AHMAD FARAZ . سلسلے توڑگیا وہ سبھی جاتے جاتے

سلسلے توڑگیا وہ سبھی جاتے جاتے
ورنہ اتنے تو مراسم تھے کہ آتے جاتے 

شکوہ ظلمت شب سے تو کہیں بہتر تھا 
اپنے حصے کی کوئی شمع جلاتے جلاتے 

کتنا آساں تھا ترے ہجر میں مرنا جاناں 
پھر بھی اک عمر لگی جان سے جاتے جاتے 

جشن مقتل ہی نہ برپا ہوا ورنہ ہم بھی 
پابجولاں ہی سہی ناچتے گاتے جاتے 

اس کی وہ جانے اسے پاسِ وفا تھا کہ نہ تھا

تم فراز اپنی طرف سے تو نبھاتے جاتے
****
آنکھ سے دور نہ ہو دل سے اتر جائے گا
وقت کا کیا ہے، گزرتا ہے گزر جائے گا

اتنا مانوس نہ ہو خلوتِ غم سے اپنی
...تو کبھی خود کو بھی دیکھے گا تو ڈر جائے گا

تم سرِ راہِ وفا دیکھتے رہ جاؤ گے
اور وہ بامِ رفاقت سے اتر جائے گا

زندگی تیری عطا ہے تو یہ جانے والا
تیری بخشش تری دہلیز پہ دھر جائے گا

ڈوبتے ڈوبتے کشتی کو اچھالا دے دوں
میں نہیں، کوئی تو ساحل پہ اتر جائے گا

ضبط لازم ہے مگر دکھ ہے قیامت کا فراز
ظالم اب کے بھی نہ روۓ گا تو مر جائے گا